Xabar berib borayotganimizdek ayni kunlarda viloyat hokimi vazifasini bajaruvchi Jo'rabek Raximov hududlarda bo'lib, qish mavsumida aholi xonadonlari va tibbiyot muassasalarini energiya resurslari bilan ta'minlash, bozorlardagi narx-navo masalalarini o'rganmoqda. Navbatdagi o'rganish manzili Xiva shahri va Xiva tumani bo'ldi.
Viloyat rahbari qishloq xo'jaligi mahsulotlarining arzonlashtirilgan savdo yarmarkalari bilan tanishdi, Xiva shahrining vaqtinchalik faoliyat ko'rsatayotgan hamda qurilishi davom etayotgan yangi dehqon bozorida bo'ldi. 2,5 gektar maydonda barpo etilayotgan dehqon bozorida 412 o'ringa mo'ljallangan yopiq pavilon va 200 dan ortiq savdo do'konlari joy olgan.
Viloyat rahbari dunyoning turli mintaqalaridan xorijiy sayyohlar tashrif buyuradigan qadim Xivaning bozori shaharning mavqeiga mos, milliy va zamonaviy me'morchilik yutuqlarini o'zida mujassam etgan o'ziga xos betakror majmua bo'lishi kerak, deb ta'kidladi. Qurilish va jihozlash jarayonida bugungi kun bilan emas, uzoq yillarga mo'ljallangan rivojlanish tendensiyalarini e'tiborga olish bo'yicha tavsiyalar berdi.
Viloyat rahbari Xiva shahar va Xiva tuman tibbiyot birlashmalari bo'limlarida bo'lib, binolarning isitilishini ko'zdan kechirdi, shifokorlar va bemorlar bilan muloqotda bo'ldi.
Viloyat hokimi vazifasini bajaruvchi Jo'rabek Raximov Xiva shahri va Xiva tumanidagi o'rganishlar jarayonida bir nechta fuqarolarni qabul qildi, ularning yer munosabatlari va ko'chmas mulkka oid murojaatlarini eshitib, har bir murojaatga asoslantirilgan javob berildi.
